Ìjàpá àti Àdàbà jọ dá oko kan

APÀÀLỌ́: Àlọ́ o!

AGBÁÀLỌ́: Àlọ̀!

APÀÀLÓ: Àlọ́ mi dá fìrìgbagbòó, ó dá lérí Ìjàpá àti Àdàbà

Ní ìgbà láéláé, ọ̀rẹ́ ni Ìjàpá àti Àdàbá ń ṣe. Ọ̀rẹ́ wọn yìí wọ̀ gan-an ni, kòríkòsùn ni wọ́n. Wọ́n jìjọ ń ṣe ohun gbogbo pọ̀ ni: tí wọ́n bá fẹ́ dá aṣọ , irúfẹ́ kan náà ni wọ́n ń dá, àpò kan náà ni wọ́n ń pa owó wọn sí, irúfẹ́ òwò kan náà ni wọ́n sì ń ṣe. Ṣùgbọ́n olúkúlùkù ni ó ní ìyàwó tirẹ̀, ilé ọ̀tọ̀ọ̀tọ̀ ni wọ́n ń gbé, olúkúlùkù sì ń bọ́ ìyàwó àti àwọn ọmọ rẹ̀.

Àwọn ọ̀rẹ́ méjì yìí wá jọ dá oko kan, oko yìí tó ibùsọ̀ méjì ní ìbú, ó sì tó ibùsọ̀ méta ní ìró. Oko yẹn kàn lọ gbansasa bí omi òkun ni. Wọ́n wá gbin orísìírísìí ohun tí ẹnu ń jẹ sínú rẹ̀: iṣu lọ salalu, gbogbo rẹ̀ ta bọ̀kùàbọ̀kùà, wọ́n sán ebè kẹ́rẹkẹ́rẹ bí ẹ̀gbẹ́ ògiri ògbólògbó ilé; ẹ̀gẹ́ ta fálafàla; àgbàdo gbọ́mọ pọ̀n dọ̀ǹkùdọ̀ǹkù, ewébẹ̀ lọ súà bíi koríko inú pápá, wọ́n dúdú mirinmirin bí ewébẹ̀ etí odò, gbogbo ohun ọ̀gbìn wọn ṣe dáradára.

İjàpá rèé, olójúkòkòrò ni. Gbogbo èrò-ọkàn rẹ̀ ni pé kí òun lè jẹ ju Àdàbà nínú irè oko yìí. Nígbà tí àwọn méjèèjì bá ti síwọ́ iṣẹ́ ní oko tí à ń wi yìí, Àdàbà á gba ọ̀nà ilé tirẹ̀ lọ, òun àti ìyàwó rè á máa jẹ àmúwá Ọlọ́run ní ìrètí pé láìpẹ́ irè oko yòó jáde, àwọn yóò wàá máa jẹ àjẹtó àti àjẹsẹ́kù, àwọn yóò sì rí tà nínú rẹ̀ láti fi ra aṣọ sára àti láti fi gbọ́ bùkátà tí ó bá kàn wọ́n. Ṣùgbọ́n èrò ọkàn Àdàbà yàtọ̀ sí ti ljàpá pátápátá. Ní alaalẹ́, ní òròòru ni Ìjàpá máa ń yọ́ wá sí oko yìí, òun àti ìyàwó rẹ̀; wọ́n á wa iṣu tẹ́rùn, wọn á ya àgbàdo kọ̀ọọ̀kan tí ó bá ti gbó, wón a gé ewébẹ̀, wọ́n á re ata. Nígbà ti wọ́n bá délé, wón á tà, wón á kó owó sí àpò tiwọn.

Nígbà tí ó bá di ọjọ́ keji, Ìjàpá ni yóò kọ́ figbe ta pé àwọn olè ti wá jí àwọn ní irè oko, á ní, ‘Háà, àwọn olè ti déhìn-ín! ẹ wo àgbàdo bí wọn ti ya á, ẹ wo iṣu wa, wọ́n ti wà á tán, ę wo ewébẹ̀ wa! Háà! Ọlọ́run ní yóò bá wa mú àwọn olè wọ̀nyí o! Àwọn alápámásisẹ́, òkú ọ̀lẹ, wọ́n á fọ̀sán sùn, wọ́n á fòru kórè iṣẹ́ oníṣẹ́. Ọlọ́run yóò tú àṣírí wọn níjọ́ kan. Ọjọ́ gbogbo ni tolè, ọjọ́ kan ni tolóhun! Abí ẹ ẹ̀ rí nǹkan.

Adàbà kò fura sí ọ̀rẹ́ rẹ̀, ó ti gbà pé kò lè wá ṣe irú iṣẹ́ ibi bẹ́ẹ̀.Kí ni èniyàn ṣe lè fi òru wá máa jí nǹkan ara rẹ̀? Ṣebí àwọn méjèèji ló ni ín, àpò kan ni àwọn si ń powó sí? Tí owó bá ń tẹ́ ẹnìkan, àwọn á tọwọ́ bọ ápò, àwọn a mú owó-iná. Àwọn olè ló ń ṣiṣẹ́ yìí, dájúdájú kò lè jé ljàpá.

Adába sà pinnu àti rídìí ẹni ti ń jí wọn ní irè oko. Ó lọ bá Ọlọ́dẹ kan tí ń gbé nítósí ilé rẹ̀, ó sì bẹ̀ ẹ́ kí ó bá òun dẹ pakúté sí gbogbo ọ̀nà tí ó wọnú oko wọn ní alẹ́, kí ó sì wá ká pákúté rẹ̀ ni òwúrọ̀ ojọ́ kejì. Ó mọ̀ dájúdájú pé olè kò lè wá sí oko wọn ní ọ̀sán nígbà tí àwọn bá sì wà níbẹ̀, òru nìkan ni olè lè wá, nítori alaalẹ́ ni wọ́n ń kúrò lóko.

Ọlọ́dẹ gbà láti ṣe iṣẹ́ yií bí iṣẹ́, ó sì kó àwọn pàkúté rẹ̀, ó dẹ wọ́n sí ojú-ọ̀nà gbogbo tí ènìyàn lè bá wọnú oko yìí, ó lọ sílé rẹ̀. Ìjàpá kò mọ̀ nípa ètò tí Adábà ṣe yìí nítorí kò sí ní ilú nígbà náà; ó ti sọ fún Àdàbà pé òun fẹ́ lọ ẹ̀yìn odi àti pé yóò tó ọjọ́ mẹ́ta kan kí òun tó padà dé. Àșé kò kúrò nílé, ọgbọ́n kí ó máa jẹun tọ̀sán-tòru láìsisẹ́ ló ń ta. Ṣe ọ̀lẹ afàjò ni tẹ́lẹ̀, Àdàbà nikan ló ń ṣiṣẹ́ àṣelàágùn nínú oko.

Nígbà tí ó di òru, ljàpá múra, ó gbé agbọ̀n kan, ó ṣáájú, ìyàwó rẹ̀ náà gbé pákátà, ó tẹ̀lé e, ó di rẹi rẹi rẹi lọ́nà oko, láì mọ̀ pé pàkúté ń bẹ lọ́nà. İyàwó rẹ̀ gbà á nímọ̀ràn pé kí wọ́n bá ọ̀nà tóóró kan tí ó wà ní ẹ̀hìnkùlé wọn já sí oko, nítorí ọ̀nà yìí yá púpọ̀ láti oko sí ilé Ìjàpá. Ṣùgbọ́n ọ̀nà yìí kún, roro tí ó máa ń mú aṣọ ènìyàn tutù sì pọ̀ lórí ewé, àwọn koríko ojú bà á máa na olúwarẹ̀ ní pàșán bí ó ti ń rìn lọ. Ìjàpá kò fẹ́ rìn irúfẹ́ ọ̀nà báyìí, pàápàá tí ó bá ru ẹrù lórí. Síbẹ̀, ó gbà sí ìyàwó rẹ̀ lẹ́nu pé kí àwọn rin ọ̀nà ábújá yìí dé oko, ṣùgbọ́n ó fi dandan lé e pé tí àwọn bá ń padà bọ̀, àwọn yóò gba ọ̀nà tí ń dán nítorí ẹrù orí àwọn o. İyàwó faramọ́ àdéhùn yìí. ljapá dé oko, ó wa iṣu , ó ká ilá, ó fẹ́ ẹ̀fọ́, ó re ata, ó já erèé, ó wú ẹ̀gẹ́, ó sì ya àgbàdo tẹ́rùn. Ó di ẹrù , ó gbérù, ìyàwó rẹ̀ náà ru oúnjẹ ní àrùṣérún, wọ́n kọrí si ọ̀nà ilé; ljàpá ṣíwájú, ìyàwó rè tẹ̀lé e. Wọn kò rìn ju ebè mẹ́wàá si ààlà oko, àfi gbàgá! àfi wiririri-i-i-wòò! İjàpá tẹsẹ̀ bọ pàkúté, ẹrù iṣu, ẹ̀gẹ́ àti àgbàdo tó rù rọ́ lé e lórí; títẹ́ ni ljàpá tẹ́ mólẹ̀; pẹlẹbẹ ló rí, bí ẹran-oníyọ̀. Káwí-káfọ̀, ljàpá dèrò ọ̀run alákeji. İyàwó rẹ̀ ti síyán, kò dúró gbobẹ̀, ó sá wálé.

Nigbà tí Ọlọ́dẹ dé ibi pákúté rẹ̀, òkú ljàpá ló bá pẹlẹbẹ lábẹ́ iṣu tí ó jí wà ní oko alásowópọ̀ tí òun àti Àdàbà jọ dá o. Báyìí ni ljàpá șe fi ìwọ̀rà, ìmọtara-ẹni-nìkan, àti àisóótọ́ pa ara rẹ̀ o. Gbogbo irè oko tó kù, àti owó tí wọ́n ti ni lápò tẹ́lẹ̀, gbogbo rẹ̀ di ti Àdàbá tí ó ti fi òtítọ́ inú ṣiṣẹ́ àṣekára.

Ìtàn yìí kọ́ wa pé kí a má máa dalẹ̀ rárá o. Àwọn àgbàlagbà ní:

'Èké ní ń pará,

Èpè ní ń polè

Ilẹ̀ dídà ní ń pọ̀rẹ́

Alájọbí ní ń pàyekan tó ṣebi.'

Nítorí náà, òtítọ́ inú ló dára, ilẹ̀ dídà kò yẹ ọmọlúwàbí o.

Ìdí àlọ́ mi rèé gbáńgbáláká,

Ìdí àlọ́ mi rèé gbảngbàlàkà;

Bí n bá purọ́ kí agogo ẹnu mi ó má ròó

Bí ǹ bá purọ́ kí agogo ẹnu mi ó máa ró lẹ́ẹ̀mẹta

Ó di pó... pó... pó!