Ìjàpá àti Àkùkọ

APÀÀLỌ́:Àlọ́ o!

AGBÁÀLỌ́:Àlọ̀!

APÀÀLỌ́:Àló mi dá fìrìgbagbòó, ó dá lérí ljàpá àti Akuko

Ní ìgbà láéláé, Ìjàpá àti Àkùkọ jọ ń ṣe ọ̀rẹ́ pọ̀. Ọ̀rẹ́ yìí wò gan-an ni. Tinútinú ni Àkùkọ fi ń bá Ìjàpá lò, ṣùgbọ́n eré ojú ni Ìjàpá ń bá Akùko ṣe, ohun ti ń wá ni ọ̀nà àtipa Àkùkọ jẹ.

Kòkòrò ni oúnjẹ Àkùkọ, tó bá sì rí yangan tàbí ìrẹsì láàtàn, Àkùkọ á fẹsẹ̀ tàn án, á yọ ọ́ jẹ. Ìjàpá rèé, kò níṣẹ́ gidi kan lọ́wọ́, kò jọ olè, kò jọ àfọwọ́rá ló ń ṣe jẹun kiri. Inú wá ń bí Ìjàpá pé Àkùkọ kàn ń soríire sá ni, orí ààtàn, ilé onílé, ibi gbogbo tó bá rìn sí ló tí ń pàdé oúnjẹ, òun Ìjàpá kò sì í rí oúnjẹ jẹ àfi iṣẹ́ àsekára, kóun jí nǹkan-oní-nǹkan, èpè ni wọ́n ń sẹ́ fún òun lójoojúmọ́, ó pinnu pé dandan àfi kóun pa Àkùkọ jẹ ló tọ́.

Nígbà tó dijọ́ kan, ó pe Àkùkọ , ó ní, ‘Àkùkọ, o tilẹ̀ yọ̀lẹ jù, o ò lè jà. Àwọn kòkòrò kékèké lo lágbára lórí rẹ̀, o ò lè bá ẹgbẹ́ rẹ jà.

Akuko ni, “họ́wù Ìjàpá, ó tilẹ̀ kó iyán mi kéré o. Mú ẹgbẹ́ mi sóde, kí ó wá wò bóyá n ó sá fún un.'

Ìjàpá ni, 'Kò burú, a ó ṣe ìdíje ni. Àkùkọ tèmi ni yóò bá ọ jà, yóò sì ségun. Ṣùgbọ́n kó má baà sí aríyànjiyàn, jẹ́ kí á lọ sọ́dọ̀ Ọba, kí ẹsẹ̀ gbogbo ìlú pé fún ìdíje náà.'

Àkùkọ gbà; wón bá gbéra, ó di ilé Ọba. Nígbà tí wọ́n débẹ̀, wọ́n rò fún Ọba, wọ́n sì fohùn sí ọjọ́ méje.

Kí ọjọ́ náà tó pé Ìjàpá ti lọ wá dígí ńlá kan, ó fi eérú nu ojú rẹ̀, ó mọ́ gaara, ó fi í sí ìpamọ́. Ó ti lọ sọ fún gbogbo ilú pé òun ní àkùkọ kan tí yóò bá Àkùkọ ọ̀rẹ́ òun díje, kí olúkúlùkù wá wòran.

Nígbà tí ọjọ́ kò, gbogbo ìlú pé; Ọba wà níbẹ̀, àwọn ìjòyè, tolówó títálákà ló wá wo ìje yìí.

Nígbà tí àkókò tó, Ìjàpá ti lọ gbé dígí rè tì sára igi kan. Ó ni òfin ìdíje náà ni pè bí ìjà bá ti bẹ̀rẹ̀, àkùkọ tòun kìí sinmi o, kò sì sẹ́nì tó gbọdọ̀ sá o. Àkùkọ ní òun gbà. Ìjàpá bá nawọ́ sibi dígí, ó ní àkùkọ tòun ló wà lọ́hùn-ún ni.

Bí Àkùkọ ti ń lọ tibínútibínú, tó ran ìyẹ́ gààrà báyìí, tó ní kí òun ó wò bóyá lóòótọ́ ni àkùkọ ljàpá wà níbẹ̀, ló bá rí ara rẹ̀ nínú dígí, ó na ìyẹ́, àkùkọ inú dígí náà şe bẹ́ẹ̀, ló bá pakuuru sí i, ló gbé ẹnu lé dígí, pà ni àkùkọ tòhún náà gbẹ́nu lè dígí, ni Àkùkọ bá ni ìyà irú èwo ló subú tẹ òun yìí, ló bá bẹ̀rẹ̀ sí í șá dígi, pà pà pàpà pà pà, ní ìrètí pé àkùkọ Ìjàpá lòun ń bá jà. Ó sá dígí títí ó rè é, ó sáà ń rí i pé àkùkọ Ìjàpá lòun ń bá jà. Ó sá dígí títí ó rẹ̀ ẹ́, ó șáà ń rí i pé 'àkùkọ Ìjàpá kò sá; òfin sì ni pé ẹnikẹ́ni kò gbọ́dọ̀ sá tí ìjà bá ti bẹ̀rẹ̀. Gbogbo ènìyàn ń pariwo pé 'Ta ni Àkùkọ ń bá jà? Àkùkọ yìí mà gọ̀ o!' Àkùkọ ń gbọ́ ariwo, ó ṣe bí wọ́n ń yin òun ni, ló túbọ̀ múra kukuku, ló ń sá dígí, pà pà pàpà pà pà. Ni Ìjàpá ń sọ pé, 'N ò sọ fún ọ, òlẹ ni ọ́; àwọn kòkòrò kéékèèké ló lágbára àtibájà, ó rí ẹgbẹ́ rẹ náà wàyí, bá a jà.'

Àkùkọ fi ẹnu sá dígí títí ó rẹ̀ ẹ́, ó ṣubú lulẹ̀, ó kú.

Báyìí ni Ìjàpá fi owú jíję pa Àkùkọ ọ̀rẹ́ rẹ̀ dànù o. Kí Ọlọ́run gbà wá lọ́wọ́ ọ̀rẹ́ afojú-fẹ́ni-má-fọkàn-fẹ́ni o. Àṣẹ.

Ìdí àlọ́ mi rèé gbáńgbáláká,

Ìdí àlọ́ mi rèé gbảngbàlàkà;

Bí n bá purọ́ kí agogo ẹnu mi ó má ròó

Bí ǹ bá purọ́ kí agogo ẹnu mi ó máa ró lẹ́ẹ̀mẹta

Ó di pó... pó... pó!