Wikipedia:Àwọn òpó márùún

Ìwé Ìmọ̀-Ọ̀fẹ́ ni Wikipedia

Wikipedia jẹ́ àkójọpọ̀ onírúurú ìmọ̀ tí ó pegedé tí ó ń ṣe ọ̀rínkiniwín àlàyé ìmọ̀ lápapọ̀ tí ó ní ẹ̀rí máa jẹ́mi nìsó tí ó yanrantí tí wọ́n ṣe àgbéyẹ̀wò rẹ̀ dáa dáa kí ó lè ba jẹ́ orísun ìmọ̀ tó ṣe gbòógì fún ọmọnìyàn káàkiri àgbáyé. Wikipedia kìí ṣe pẹpẹ ìpolówó ọjà, ìkànnì ìbánidọ́rẹ̀ẹ́, ìpolongo ara-ẹni tàbí pẹpẹ tí a ti ń dánra ẹni wò fún ìpegdé kìí ṣe ibi tí a ti lè sọ àsọ gbọnnu tàbí ma jíròrò ọ̀rọ̀ ìṣèlú, kìí ṣe ibi tí a lè kọ ǹkan ṣákálá sí. Ẹ̀wẹ̀, Wikipedia kìí ṣe Ìwé atúmọ̀ èdè, Ìwé-Ìròyìn, Ìwé ìkọ́niníṣẹ́ tàbi ibi tí a ti lè ma wá àwọn àwòrán, bí ó tilẹ̀ jẹ́ wípé a ní àwọn iṣẹ àkànṣe mìír̀an tí ó dá lé irúfẹ̀ ìwádìí àwòrán.

Kíkọ Wikipedia láìṣojúṣájú

Àwọn aláfikún sí Wikipedia ní wọ́n gbọ́dọ̀ sapá láti kọ àwọn ayọkà àti àkọsílẹ̀ orí Wikipedia láì ṣe ègbè tàbí ró ilé apá kan dá apá kan sí tàbí ṣe ojú-ìṣájú níbi àgbékalẹ̀ wọn, bí ǹkan bá ṣe rí ni wọ́n ma kọọ́ sílẹ̀. Wọ́n ma ń gbìyànjú láti yàgò fún ìpolongo tí kò lẹ́tọ̀ọ́. Wọ́n kìí ṣe fàá-kája lórí ọ̀rọ̀ tí kò lẹ́sẹ̀ nílẹ̀, dípò bẹ́ẹ̀ onírúurú àríwòye àti ẹ̀rí máa jẹ́mi nìṣó tí ó bá wà ní àrọ́wọ́tó ni wón yóò lò láti fi gbe ẹ̀rí ọ̀rọ̀ wọn. Gbogbo àyọkà pátá ni wọ́n gbọ́dọ̀ ṣe lámèyìtọ́ ìjágeere wọn pẹ̀lú àwọn ìtọ́kasí tí ó rẹ́sẹ̀walẹ̀, pàá pàá jùlọ bí àyọkà kan bá fẹ́ lọ́júpọ̀ tàbí tí ó bá jẹ́ àyọkà nípa alààyè ènìyàn. Láfikún, a kò fàyè gba ' ìrírí, èrò, tàbí ìròrí aláfikún lórí Wikipedia. Bí ẹyẹ bá ṣe fò la ṣe ń sọ̀kò rẹ̀.

Ìwé Ìmọ̀-Ọ̀fẹ́ Wikipedia ni a le lò ṣàtúnṣe tàbí pin káàkiri lọ́fẹ̀ẹ́

Gbogbo àwọn aláfikún sí ìwé Ìmọ̀-Ọ̀fẹ́ Wikipedia ni wọ́n ti yọ̀nda àpilẹ̀kọ/iṣẹ́ wọn fún àwùjọ lọ́fẹ̀ẹ́, bá kan náà ni aláfikún kan kan kò ní ẹ̀tọ́ lorí àpilẹ̀kọ kan kan– èyíkéyìí nínú àpilẹ̀kọ wọn ni eẹlòmíràn lè ṣe àtúnṣe/àyípadà sí tàbí pin ká nígbà-kúùgbà. Bákan náà ni wọ́n gbọ́dọ̀ bọ̀wọ̀ fún òfin àmúlò, wọn kò sì gbọdọ̀ ṣe àdàkọ ṣánpọ́nná láti ibi-kí-bi sórí Wikipedia. Ṣíṣe àyálò ohun tí kìí ṣe àwòrán ni a gbà wọlé lábẹ́ òfin ìyálò ránpẹ́, ṣùgbọ́n aláfikún ní láti kọ́kọ́ sapá láti wá èyí tí ó jẹ́ ọ̀fẹ́ ṣáájú kí wọ́n tó lè lo ìyálò ránpẹ́.

Ìfọ̀wọ̀-wọra-ẹni tàbí ìbọ̀wọ̀fúnra-ẹni àti ìṣe ọmọlúàbí lórí Wikipedia

Ìwà ìrẹ̀lẹ̀ jẹ́ ara ìṣe wa ní Wikipedia, ó sì wà lára òpó marún tí ó gbé Wikipedia ró. Ètò ìmúlò yìí ṣe àlàyé nípa bí a ṣe fẹ́ kí oníṣẹ́ ṣe máa dojú kọ ìṣòro tí wọ́n bá yọjú. Níwọ̀nba, àwọn olóòtú gbọ́dọ̀ ḿa bọ̀wọ̀ fún ara wọn. Kí wọ́n máa gbìyànjú lati mú ìtẹ̀síwájú bá ìwé-ìmọ ọ̀fẹ́ kí wọ́n sì máa hu ìwà tó dára, pẹ̀lú ìrẹ̀lẹ̀, ìwà tútú, pàápàá jùlọ tí ìtàkùrọ́sọ̀ bá ń gbóná janjan. nígbà tí wọ́n bá ń bá ara wọn sọ̀rọ̀ ní Wikipedia, pẹ̀lú ọ̀rọ̀ ní ojú ewé ọ̀rọ̀ oníṣẹ́ àtí ojú ewé ọ̀rọ̀ àyọkà àti gbogbo ìjíròrò pèlú tàbí nípa àwọn ẹlẹgbẹ́ rẹ tí ó jẹ́ olootú Wikipedia. Bọ̀wọ̀ fún aláfikún bíi tìẹ, kódà bí ojú ìwòye yín kò bá papọ̀. O gbọ́dọ̀ lo Ìwà ọmọlúàbì kí o sì yàgò fún ìwà àbùkù tàbí ìkọlura àtúnṣe tí ó lè fa ìjà. Gbìyànjú kí o ní ìgbàgbọ́ nínú ìpinu àwọn olóòtú akẹgbẹ́ rẹ. Ṣe dáada sí àwọn aláfikún tí ó ṣẹ̀ṣẹ̀ dé. Ìwà ìrẹ̀lẹ̀ tí Wikipedia fẹ́ níṣe pẹ̀lú bí ọrọ̀ bá ṣe bí ọ̀rọ̀ láàrín ìwọ àti aláfikún mìíràn, ẹ jọ jíròrò lórí rẹ̀ pẹ̀lú ìrẹ̀lẹ̀ lórí ojú ewé ọ̀rọ̀ oníṣẹ́ yín, kí ẹ sì tẹ̀lé ìlànà ìfòpin sí aáwọ̀, kí ẹ sì fi sọ́kàn wípé àyọkà pọ̀ lórí Yorùbá Wikipedia tí ẹ ní láti ṣiṣẹ́ lé nípa sísọ̀rọ̀ ìtẹ̀síwájú nípa wọn ju aáwọ̀ tiyín lọ.

Òfin Wikipedia kò le danin-danin

Lòótọ́ a ní Òfin àti Ìlànà Wikipedia, àmọ́ wọn kò le danin-danin; a lè ṣe àtúnṣe àti àyípadà sí wọn nígbà-kúùgbà tí ó bá yẹ. Òfin àti Ìlànà Wikipedia yí kàn wà fún ìtọ́ni lásán ni, ohun tí ó ṣe pàtàkì jùlọ ni kí o ní Ìgboyà, tí kìí ṣe ìgboyà láti ba ohun tí ó dára jẹ́ pẹ̀lú àìmọ̀kan àti àìlákíyèsí lórí àwọn àyọkà orí Wikipedi èdè Yorùbá. Sì má banújẹ́ wípé o ṣe àṣìṣe: tí o bá ṣe àṣìṣẹ lórí Wíkì yí, àwọn àláfikún bíi tìrẹ yóò tún un ṣe pàdà nítorí gbogbo ohun tí a bá ṣe ni yóò wà ní ìpamọ́ gbangba fún àwọn tókù.