Ọba Síkírù Adétọ̀nà

Ọba Síkírù Káyọ̀dé Adétọ̀nà, Awùjalẹ̀ tí ìlú Ìjẹ̀bú pátápátá (tí wọ́n bí ní Ọjọ́ kẹwàá oṣù karùn-ún ọdún 1934) ni Ọba aládé tí ó ga jùlọ nílẹ̀ Ìjẹ̀bú ni ìpínlẹ̀ Ògùn lórílẹ̀ èdè Nàìjíríà. Awùjalẹ̀ gorí ìtẹ́ àwọn bàbá rẹ̀ lọ́dún 1960.

Ìgbà èwe àti aáyan ìkẹ́kọ̀ọ́ rẹ̀

Gẹ́gẹ́ bí a ti sọ ṣáájú, wọ́n bí Ọba Síkírù Káyọ̀dé Adétọ̀nà lọ́jọ́ kẹwàá oṣù karùn-ún ọdún 1934 sì ìdílé ọlọ́ba Aníkìláyà ti Ọmọba Rùfáí Adétọ̀nà, bàbá rẹ̀, àti Àlájà Ajíbábi Adétọ̀nà. Ó bẹ̀rẹ̀ ìkẹ́kọ̀ọ́ rẹ̀ ní Ògbéré United Primary School, ní Òkè Agbo, Ìjẹ̀bú Igbó àti Ansar-Ud-Deen School, Ìjẹ̀bú-Òde láàárín ọdún 1943 sí 1950. Fún ìpele kejì ẹ̀kọ́ rẹ̀, ó lọ sí Olú Ìwà College, (tí wọ́n ń pè ní Adéọlá Odùtọ́lá College báyìí). Ní kété tí ó ṣèyí, àwọn òyìnbó tí ń ṣàkóso orílẹ̀ èdè Nàìjíríà gbà á sí isẹ́ ní ìlú Ìbàdàn lọ́dún 1957. Ọmọba Adétọ̀nà kọ̀wé fiṣẹ́ sílẹ̀ lọ́dún 1958 láti tẹ̀ síwájú nínú ẹ̀kọ́ rẹ̀ ní orílè-èdè Gẹ̀ẹ́sì nínú ìmọ̀ ìṣirò owó.

Bí Ọba Síkírù Káyọ̀dé Adétọ̀nà ṣe jọba

Ìlú Gẹ̀ẹ́sì ni Ọmọba Adétọ̀nà wà tí ìjọba orílẹ̀ èdè Nàìjíríà fi fọwọ́ sí ìwé àṣẹ láti fi í jọba lọ́jọ́ kẹrin oṣù kìíní ọdún 1960. Ó jọba lọ́jọ́ karùn-ún oṣù karùn-ún lọ́dún 1960.