Jump to content

Sissy Spacek

Lát'ọwọ́ Wikipedia, ìwé ìmọ̀ ọ̀fẹ́
Sissy Spacek

Mary Elizabeth "Sissy" Spacek ( /ˈspeɪsɛk/; tí a bí ní ọjọ́ kẹẹdọ́gbọ̀n Oṣù kejìlá, ọdún 1949) jẹ́ òṣèré àti olórin ọmọ orílẹ̀-èdè Amẹ́ríkà. Ó ti gba ọ̀pọ̀lọpọ̀ àmì-ẹ̀yẹ jálẹ̀ iṣẹ́ rẹ̀ tí ó ti tó ẹ̀wádún márùn-ún, pẹ̀lú Àmì-ẹ̀yẹ Academy kan, Àmì-ẹ̀yẹ Golden Globe mẹ́ta, àti Àmì-ẹ̀yẹ Screen Actors Guild bákan náà pẹ̀lú yíyàn fún Àmì-ẹ̀yẹ British Academy Film mẹ́rin, Àmì-ẹ̀yẹ Primetime Emmy mẹ́ta, àti Àmì-ẹ̀yẹ Grammy kan. Fún ipa rẹ̀ nínú ilé-iṣẹ́ sinimá, wọ́n bu ọlá fún Spacek pẹ̀lú ìràwọ̀ kan lórí Hollywood Walk of Fame ní ọdún 2011.[1]

Lẹ́yìn tí ó kẹ́kọ̀ọ́ ní Lee Strasberg Theatre and Film Institute, Spacek ṣe ìfarahàn àkọ́kọ́ rẹ̀ nínú eré sinimá nínú eré Michael Ritchie tí àkọlé rẹ̀ jẹ́ Prime Cut (1972). Iṣẹ́ rẹ̀ nínú eré oní-ìwà-ọ̀daràn neo-noir ti Terrence Malick tí àkọlé rẹ̀ jẹ́ Badlands (1973), mú kí wọ́n yàn án fún Àmì-ẹ̀yẹ BAFTA fún Òṣèré Tuntun Tí Ó Ní Ìlérí Jùlọ. Ìlúmọ̀ká Spacek wáyé nígbà tí ó ṣe ẹ̀dá-ìtàn ọ̀dọ́ tí wọ́n ń fìyà jẹ, tí í ṣe olú-ẹ̀dá-ìtàn tí ó ní agbára àràmàdà láti gbé nǹkan láì fọwọ́ kàn án nínú eré ẹ̀rù àràmàdà Brian De Palma tí àkọlé rẹ̀ jẹ́ Carrie (1976), èyí tí ó fun ní àkọ́kọ́ nínú ìyàn mẹ́fa fún Àmì-ẹ̀yẹ Academy fún Òṣèré Obìnrin Tí Ó Dára Jùlọ. Lẹ́yìn náà, ó ṣe olú-ẹ̀dá nínú eré oní-ròjinlẹ̀ Robert Altman tí àkọlé rẹ̀ jẹ́ 3 Women (1977). Iṣẹ́ títayọ Spacek gẹ́gẹ́ bí i gbajúmọ̀ orin country Loretta Lynn nínú eré oní-orin ìtàn ìgbésí ayé Michael Apted tí àkọlé rẹ̀ jẹ́ Coal Miner's Daughter (1980), nínú èyí tí ó ṣe ẹ̀dá Lynn láti nǹkan bí ọmọ ọdún mẹ́tàlá títí dé àárín ọjọ́-orí tí ó sì kọrin fúnra rẹ̀, mú kí ó gba Àmì-ẹ̀yẹ Academy àti Àmì-ẹ̀yẹ Golden Globe. Ó tún gba ìyàn Àmì-ẹ̀yẹ Academy mẹ́rin mìíràn fún àwọn ipa rẹ̀ nínú Missing (1982), The River (1984), Crimes of the Heart (1986), àti In the Bedroom (2001). Spacek gba Àmì-ẹ̀yẹ Golden Globe fún èyí ìkẹyìn yí. Àwọn eré sinimá rẹ̀ mìíràn tí ó gbajúmọ̀ pẹ̀lú Raggedy Man (1981), 'night, Mother (1986), The Long Walk Home (1990), JFK (1991), Affliction (1997), The Straight Story (1999), Nine Lives (2005), North Country (2005), Get Low (2010), The Help (2011), The Old Man & the Gun (2018), àti Sam & Kate (2022).

Ní orí tẹlifíṣọ̀n, Spacek gba ìyàn Àmì-ẹ̀yẹ Primetime Emmy àkọ́kọ́ rẹ̀ fún ipa rẹ̀ nínú eré sinimá Western The Good Old Boys (1995). Nígbà tí ó yá, wọ́n yàn án fún Emmy fún Òṣèré Obìnrin Èkejì Tí Ó Dára Jùlọ nínú Eré Oní-ọ̀wọ̀ tí kò gùn tàbí Eré Sinimá àti Òṣèré Obìnrin Àlejò Tí Ó Dára Jùlọ nínú Eré Oní-ròjinlẹ̀ Oní-ọ̀wọ̀ fún iṣẹ́ rẹ̀ nínú eré sinimá oní-ròjinlẹ̀ Last Call (2002) àti eré oní-ọ̀wọ̀ HBO Big Love (2010–2011), ní ṣísẹ̀-n-tẹ̀lé. Spacek ṣe ẹ̀dá ìyá agbo ilé Sally Rayburn nínú eré oní-ọ̀wọ̀ Netflix Bloodline (2015–2017),[2] Ruth Deaver nínú eré oní-ọ̀wọ̀ Hulu Castle Rock (2018), àti Ellen Bergman nínú eré oní-ọ̀wọ̀ Amazon Prime Video Homecoming (2018). Àwọn iṣẹ́ rẹ̀ mìíràn tí ó gbajúmọ̀ lórí tẹlifíṣọ̀n pẹ̀lú àwọn eré sinimá The Migrants (1974), A Place for Annie (1994), If These Walls Could Talk (1996), Midwives (2001) àti Pictures of Hollis Woods (2007), àti eré oní-ọ̀wọ̀ Night Sky (2022).

Spacek tún ti dárà mọ́ ilé-iṣẹ́ orin. Ní ọdún 1968, lábẹ́ orúkọ ìnagijẹ Rainbo, ó gbohùn sí orin àdákọ àkọ́kọ́ rẹ̀ "John You Went Too Far This Time". Nígbà tí ọjà kò lọ dáadáa, ilé-iṣẹ́ agbórin-jáde rẹ̀ yọ ọ́ sílẹ̀. Lẹ́yìn náà ó gbohùn sí àwo orin sinimá ti Coal Miner's Daughter, èyí tí ó dé ipò kejì lórí àtẹ Àwọn Àwo Orin Country Tí Ó Dára Jùlọ ti Billboard, tí ó sì fún un ní ìyàn fún Àmì-ẹ̀yẹ Grammy fún Iṣẹ́ Olórin Obìnrin Country Tí Ó Dára Jùlọ. Spacek tẹ̀síwájú láti gbé àwo orin studio àkọ́kọ́ rẹ̀ jáde, Hangin' Up My Heart (1983).

Ìbẹ̀rẹ̀ ayé àti ẹ̀kọ́

[àtúnṣe | àtúnṣe àmìọ̀rọ̀]

A bí Mary Elizabeth Spacek ní Ọjọ́ Kérésìmesì ọdún 1949,[3] ní Quitman, Texas, gẹ́gẹ́ bí ọmọ Virginia Frances (née Spilman, 1917–1981)[4] àti Edwin Arnold Spacek Sr.,[5]  aṣojú iṣẹ́-àgbẹ̀ Agbègbè Wood ní Quitman. Bàbá rẹ̀ jẹ́ ọmọ ìran Czech (Moravian) ní abala mẹ́ta nínú mẹ́rin àti ìran Sudeten-German ní abala kan nínú mẹ́rin; àwọn òbí bàbá rẹ̀ ni Mary (née Cervenka) àti Arnold A. Spacek (ẹni tí ó sìn gẹ́gẹ́ bí i olórí ìlú Granger, Texas ní Ìgbèríko Williamson).[6][7] Rip Torn jẹ́ ìbátan rẹ̀;[8] ìyá rẹ̀ Thelma Torn (née Spacek) jẹ́ ẹ̀gbọ́n obìnrin fún bàbá Sissy, Edwin.[9] Ìyá Spacek, ẹni tí ó jẹ́ ìran Gẹ̀ẹ́sì àti Irish, wá láti Rio Grande Valley ti Texas.[10]

Nígbà tí ó wà ní ọmọ ọdún mẹ́fà, Spacek gun orí ìtàgé fún ìgbà àkọ́kọ́ nínú ìfihàn ẹ̀bùn ti àdúgbò.[11] Bí ó tilẹ̀ jẹ́ pé orúkọ àbísọ rẹ̀ ń jẹ́ Mary Elizabeth, Sissy ni àwọn ẹ̀gbọ́n rẹ̀ ọkùnrin máa ń pè é, èyí tí ó yọrí sí orúkọ ìnagijẹ rẹ̀, Sissy, tí ó ti inú 'sister' wá, tí ó sì jẹ́ wọ́pọ̀ orúkọ ìnagijẹ ní Gúúsù/Texas.[12] Ó lọ sí Ilé-ìwé Gíga Quitman.[11]

Ikú ẹ̀gbọ́n rẹ̀ ọkùnrin Robbie tí ó jẹ́ ọmọ ọdún mọ́kàndínlógún ní ọdún 1967 nípasẹ̀ àrùn leukemia kan Spacek lára gidigidi, èyí tí ó pè ní "ìṣẹ̀lẹ̀ tí ó ṣe ìtumọ̀ gbogbo ayé mi."[13] Ó sọ pé ìjábá náà mú kí òun jẹ́ aláìbẹ̀rù nínú iṣẹ́ òṣèré rẹ̀:

"Mo rò pé ó sọ mí di alágbára. Tí o bá ti ni ìrírí irú nǹkan bẹ́ẹ̀, o ti ní ìrírí ìjábá tí ó ga jùlọ. Tí o bá sì lè tẹ̀síwájú, kò sí nǹkan mìíràn tí ó lè dẹ́rù bà ọ́. Ohun tí mo ní lọ́kàn nípa pé ó jẹ́ epo tí ń gbé nǹkan lọ sókè nìyẹn—mo di aláìbẹ̀rù ní ọ̀nà kan. Bóyá ó fún iṣẹ́ mi ní ìjìnlẹ̀ sí i nítorí pé mo ti ní ìrírí ohun kan tí ó jinlẹ̀ tí ó sì yí ayé padà."

— Sissy Spacek (2015)[14]

Lákọ̀ọ́kọ́, Spacek ní èrò láti ní iṣẹ́ orin. Ní ọdún 1968, lábẹ́ orúkọ ìnagijẹ Rainbo, ó gbohùn sí orin àdákọ kan, "John You Went Too Far This Time",[citation needed] àwọn ọ̀rọ̀ inú èyí tí ó ń bawi John Lennon fún àwòrán ìbòrí àwo-orin rẹ̀ àti ti Yoko Ono ní ìhòòhò fún Two Virgins. Nígbà tí títà orin rẹ̀ kò lọ dáadáa, ilé-iṣẹ́ agbórin-jáde rẹ̀ yọ ọ́ sílẹ̀. Ó yí àkíyèsí rẹ̀ sí iṣẹ́ eré-oníṣe, ó sì wọlé sí Lee Strasberg Theatre and Film Institute.

Iṣẹ́

[àtúnṣe | àtúnṣe àmìọ̀rọ̀]

Àwọn ọdún 1970: Iṣẹ́ àkọ́kọ́ àti ìmúgbòòrò òkìkí

[àtúnṣe | àtúnṣe àmìọ̀rọ̀]

Spacek ṣiṣẹ́ gẹ́gẹ́ bí i mọ́dẹ́lì tí a ń yàwòrán (tí Ford Models ń ṣojú) àti gẹ́gẹ́ bí i òṣèré àfikún ní Factory ti Andy Warhol. Pẹ̀lú ìrànlọ́wọ́ ìbátan rẹ̀, òṣèré Rip Torn, ó wọlé sí Actors Studio ti Lee Strasberg àti lẹ́yìn náà sí Lee Strasberg Theatre and Film Institute.

Ipa eré sinimá àkọ́kọ́ tí a to orúkọ Spacek mọ́ wáyé nínú eré oní-ìwà-ọ̀daràn ológun Prime Cut (1972), nínú èyí tí ó ṣe Poppy, ọmọbìnrin tí wọ́n tà sínú oko-ẹrú ìbálòpọ̀.[10] Eré sinimá náà fa ipa àlejò nínú eré oní-ọ̀wọ̀ tẹlifíṣọ̀n The Waltons (1973), èyí tí ó ṣe ní ẹ̀mẹjì. Spacek gba àkíyèsí kárí-ayé fún ipa rẹ̀ tí ó sọ ọ́ di ìlúmọ̀ká nínú eré sinimá oní-ìwà-ọ̀daràn neo-noir ti Terrence Malick tí àkọlé rẹ̀ jẹ́ Badlands (1973); ó ṣe Holly, olùsọ̀tàn eré náà àti ọ̀rẹ́bìnrin ọlọ́dún mẹ́ẹ̀dógún ti apànìyàn tẹ̀léra Kit (Martin Sheen).[10] Spacek ti ṣe àpèjúwe Badlands gẹ́gẹ́ bí i ìrírí "tí ó kàmàmà jùlọ" nínú iṣẹ́ rẹ̀.[15] Vincent Canby ti The New York Times pè é ní "eré sinimá Amẹ́ríkà tí ó wuyi, tí ó wà lọ́wọ́lọ́wọ́ nígbà mìíràn, tí ó sì múná nígbà gbogbo", ó sì kọ̀wé pé "Sheen àti Arábìnrin Spacek tayọ gẹ́gẹ́ bí i alára-ẹni, òǹrorò, àti bóyá àwọn ọmọ tí orí wọn kò pé ti àkókò wa."[16] Ní ibi ìyawòrán Badlands, Spacek pàdé olùdarí iṣẹ́-ọnà Jack Fisk, ẹni tí ó fẹ́ ní ọdún 1974.[11] Ó ṣiṣẹ́ gẹ́gẹ́ bí i olùtọ́jú ètò-ìpele fún eré sinimá Brian De Palma tí àkọlé rẹ̀ jẹ́ Phantom of the Paradise (1974).

Ipa ìbẹ̀rẹ̀ tí ó gbajúmọ̀ jùlọ fún Spacek wáyé nínú eré sinimá ẹ̀rù àràmàdà ti De Palma Carrie (1976), níbi tí ó ti ṣe Carrie White, akẹ́kọ̀ọ́ ilé-ìwé gíga onítìjú, tí ó ní ìdààmú ọkàn pẹ̀lú agbára àràmàdà láti gbé nǹkan láì fọwọ́ kàn án.[10] Spacek níláti ṣiṣẹ́ kára láti yí De Palma lọ́kàn padà láti fún un ní ipa náà.[10] Lẹ́yìn títọ́ Vaseline sí irun rẹ̀ àti wíwọ ògbólógbòó ẹ̀wù atukọ̀ tí ìyá rẹ̀ ti rán fún un nígbà tí ó wà ní ọmọdé, ó yọjú sí ibi ìdánwò náà pẹ̀lú àìsí ìrètí, ṣùgbọ́n ó gba ipa náà.[17] Iṣẹ́ Spacek gba ìyìn kárí-ayé ó sì fa yíyàn fún Àmì-ẹ̀yẹ Academy fún Òṣèré Obìnrin Tí Ó Dára Jùlọ. Pauline Kael ti The New Yorker kọ̀wé pé: "Bí ó tilẹ̀ jẹ́ pé àwọn òṣèré obìnrin díẹ̀ ló ti fi ara wọn hàn kedere nínú gothics, Sissy Spacek, tí ó wà lójú ìwòrán fún gbogbo ìgbà, ṣe iṣẹ́ àwòṣífèè tí ó tayọ. Ó ń yípadà sẹ́yìn àti síwájú: ọmọdé tí ń fọhùn imú, tí ń kùn; ọ̀dọ́bìnrin arẹwà oníwà-tútù níbi ayẹyẹ; àti lẹ́yìn náà ìyípadà kejì nígbà tí ìwà ìparun rẹ̀ bú jáde tí ó sì sọ ọ́ di arúgbó. Spacek lo ojú rẹ̀ tí ó kún fún ẹfin àti ìpépejú funfun láti ṣàfihàn ọmọbìnrin tí a tẹ̀ lórí ba, tí ó ń sùn, ẹni tí ó lè lọ sí ibikíbi; nígbà mìíràn, ó jọ ẹni tí a kò tíì dáyé—oyún inú. N kò rí bí iṣẹ́ yìí ṣe lè dára ju èyí lọ; ó ń wọni lára, gẹ́gẹ́ bí i Elizabeth Hartman nínú ọ̀kan lára àwọn ipa rẹ̀ bí i ẹni tí a fìyà jẹ, ṣùgbọ́n ó tún jọ ẹni tí kò sí ní ayé yìí—abiku."[18]

Lẹ́yìn àṣeyọrí Carrie, Spacek ṣe ipa olùtọ́jú ilé Linda Murray nínú eré oní-orin onífẹ̀ẹ́ Alan Rudolph tí àkọlé rẹ̀ jẹ́ Welcome to L.A. (1976) ó sì fìdí òkìkí rẹ̀ múlẹ̀ nínú eré sinimá olómìnira pẹ̀lú iṣẹ́ rẹ̀ gẹ́gẹ́ bí i Pinky Rose nínú eré oní-ròjinlẹ̀ Robert Altman tí àkọlé rẹ̀ jẹ́ 3 Women (1977). Àgbéyẹ̀wò kan nínú The New York Times sọ pé, "Nínú eré sinimá yìí Arábìnrin Spacek ṣàfikún ìwọ̀n tuntun ti ohun àràmàdà sí ẹni tí a kò mọ ìpilẹ̀ṣẹ̀ rẹ̀ tí ó ṣe pẹ̀lú ìmọ̀lára gidi nínú Carrie."[19] Iṣẹ́ rẹ̀ wú Altman lórí gidigidi: "Ó tayọ, ọ̀kan lára àwọn òṣèré obìnrin tí ó ga jùlọ tí mo ti bá ṣiṣẹ́ rí. Àwọn ohun àmúṣiṣẹ́ rẹ̀ dàbí kànga jíjìn." De Palma sọ pé: "[Spacek jẹ́] ẹ̀mí àìrí. Ó ní ọ̀nà àràmàdà láti wọ inú ipa kan, láti jẹ́ kí ó gba òun lọ́kàn. Ó ní agbára ju èyíkéyìí òṣèré obìnrin ọ̀dọ́ tí mo mọ̀ lọ."[20] Spacek ṣe ìrànlọ́wọ́ láti sanwó fún Eraserhead (1977), iṣẹ́ olùdarí àkọ́kọ́ ti David Lynch, wọ́n sì dúpẹ́ lọ́wọ́ rẹ̀ nínú àtò-orúkọ ìparí eré náà.

Àwọn ọdún 1980: Ìyìn tí ó tẹ̀síwájú àti orin

[àtúnṣe | àtúnṣe àmìọ̀rọ̀]
Spacek ṣe ẹ̀dá Loretta Lynn nínú Coal Miner's Daughter, èyí tí ó fún un ní Àmì-ẹ̀yẹ Academy fún Òṣèré Obìnrin Tí Ó Dára Jùlọ.

Spacek bẹ̀rẹ̀ àwọn ọdún 1980 pẹ̀lú Àmì-ẹ̀yẹ Academy fún Òṣèré Obìnrin Tí Ó Dára Jùlọ fún iṣẹ́ rẹ̀ nínú eré oní-orin ìtàn ìgbésí ayé Michael Apted tí àkọlé rẹ̀ jẹ́ Coal Miner's Daughter (1980), nínú èyí tí ó ṣe ẹ̀dá gbajúmọ̀ orin country Loretta Lynn, ẹni tí ó fúnra rẹ̀ yan Spacek fún ipa náà.[10] Yàtọ̀ sí Oscar, ó tún gba Àmì-ẹ̀yẹ New York Film Critics Circle, Àmì-ẹ̀yẹ Los Angeles Film Critics Association, Àmì-ẹ̀yẹ National Society of Film Critics àti Àmì-ẹ̀yẹ Golden Globe fún Òṣèré Obìnrin Tí Ó Dára Jùlọ. Àti Spacek àti Beverly D'Angelo, ẹni tí ó ṣe Patsy Cline, lo ohùn wọn gangan láti kọrin nínú eré náà.[10] Roger Ebert sọ pé àṣeyọrí eré náà wá láti ọwọ́ "iṣẹ́ Sissy Spacek gẹ́gẹ́ bí i Loretta Lynn. Pẹ̀lú irú idán kan náà tí ó ti lò tẹ́lẹ̀, nígbà tí ó ṣe ọmọdé ilé-ìwé gíga nínú Carrie, Spacek ní ọmọ ọdún mọ́kàndínlọ́gbọ̀n ní agbára láti jọ ẹni tí ó wà ní ọjọ́-orí yòówù lójú ìwòrán. Níhìn-ín, ó dàgbà láti nǹkan bí ọmọ ọdún mẹ́rinlá sí nǹkan bí àwọn ọdún ọgbọ̀n rẹ̀, ó jọ ọjọ́-orí náà nígbà gbogbo, kò sì jọ pé ó lo èròjà ìṣaralóge rárá."[21] Andrew Sarris ti The Village Voice kọ̀wé pé: "Sissy Spacek—bẹ́ẹ̀ni, ẹnu yà mí—wà ní ìrẹ̀lẹ̀ ó sì ṣe déédé gẹ́gẹ́ bí i Lynn. Ojú Spacek kì í ṣe irinṣẹ́ òṣèré ju bí ó ti wà tẹ́lẹ̀ lọ, ṣùgbọ́n bí a bá fún un ní ẹ̀dá ènìyàn láti ṣe, tí a bá fún un ní olùdarí tí ó mọ nípa eré-oníṣe, ó máa ń sọ obìnrin náà di ẹni tí ó wà láàyè. Ó kọ àwọn orin náà fúnra rẹ̀, lọ́nà tí ó dára, ó sì gbọ́ ìsọ̀rọ̀sí Appalachian yanjú."[22] Wọn tún yan Spacek fún Àmì-ẹ̀yẹ Grammy fún Iṣẹ́ Olórin Obìnrin Country Tí Ó Dára Jùlọ fún àwo orin sinimá náà. Ó tẹ̀lé èyí pẹ̀lú àwo orin country ti ara rẹ̀, Hangin' Up My Heart (1983); èyí tí ó mú orin àdákọ tí ó gbajúmọ̀ kan jáde, "Lonely but Only for You," orin tí K. T. Oslin kọ, èyí tí ó dé ipò kẹẹ̀ẹ́dógún lórí àtẹ Hot Country Songs ti Billboard.[23]

Nínú eré oní-ròjinlẹ̀ onífẹ̀ẹ́ John Byrum tí àkọlé rẹ̀ jẹ́ Heart Beat (1980), Spacek ṣe ẹ̀dá Carolyn Cassady, ẹni tí—lábẹ́ ipa Jack Kerouac (John Heard) àti Neal Cassady (Nick Nolte)—bọ́ sínú àpòpọ̀ iṣẹ́ àṣekú àti ìwà pálapàla.[24][25] Spacek fẹ́ ipa náà débi pé ó ka ohun tí ó ju ẹgbẹ̀rún mẹ́rin ojú-ewé ìwádìí lọ láti múra sílẹ̀ fún ẹ̀dá náà. Byrum àti olùgbéré-jáde Ed Pressman mú un lọ sí ibi oúnjẹ alẹ́ láti sọ fún un pé kò rí ipa náà. Ìròyìn náà ba Spacek nínú jẹ́ débi pé ó fọ ife wáìnì mọ́lẹ̀ lọ́wọ́ rẹ̀. Lẹ́yìn náà, Pressman tọ̀ ọ́ lọ pẹ̀lú èérún ife tí ó fọ́ náà, ó sì sọ fún un pé ó ti gba ipa náà. Ó sọ pé fífọ́ tí Spacek fọ ife náà ló parí ọ̀rọ̀ náà, wọ́n sì gbàgbọ́ pé òun ló máa ba ipa náà mu jùlọ.[26] Wọ́n gbé eré náà jáde ní ọjọ́ kẹẹdọ́gbọ̀n Oṣù kẹrin, ọdún 1980, sí àgbéyẹ̀wò onírúurú.[27] Ebert pe iṣẹ́ Spacek ní "èyí tí ó ṣe lọ́nà àràmàdà", àti pé àwọn ìran rẹ̀ pẹ̀lú Heard àti Nolte "fẹ́rẹ̀ẹ́ dàbí ewì".[28]

Ní ọdún 1982, Spacek kópa pẹ̀lú Jack Lemmon nínú eré oní-ròjinlẹ̀ ìtàn ìgbésí ayé Costa-Gavras tí àkọlé rẹ̀ jẹ́ Missing (èyí tí ó dá lórí ìwé The Execution of Charles Horman: An American Sacrifice láti ọwọ́ Thomas Hauser). Ó kópa pẹ̀lú Mel Gibson nínú eré oní-ròjinlẹ̀ Mark Rydell tí àkọlé rẹ̀ jẹ́ The River (1984), àti pẹ̀lú Diane Keaton àti Jessica Lange nínú eré sinimá apanilẹ́rìn-ín oní-ròjinlẹ̀ ti Bruce Beresford Crimes of the Heart (1986).[10] Wọ́n yan Spacek fún Àmì-ẹ̀yẹ Academy fún Òṣèré Obìnrin Tí Ó Dára Jùlọ fún gbogbo àwọn ipa wọ̀nyí, ó sì gba Àmì-ẹ̀yẹ Golden Globe rẹ̀ kejì fún èyí tí ó kẹ́yìn.[10] Àwọn iṣẹ́ mìíràn ní ẹ̀wádún náà pẹ̀lú ipa olú-ẹ̀dá nínú iṣẹ́ olùdarí àkọ́kọ́ ti ọkọ rẹ̀ Jack Fisk Raggedy Man (1981) àti eré oní-ròjinlẹ̀ Tom Moore 'night, Mother (1986), pẹ̀lú Anne Bancroft.[10] Spacek fi ẹ̀fẹ̀ hàn nípa gbígbọ́hùn fún ọpọlọ nínú eré sinimá ìmọ̀-ìjìnlẹ̀ apanilẹ́rìn-ín ti Carl Reiner The Man with Two Brains (1983), èyí tí Steve Martin kópa nínú rẹ̀.[29]

Àwọn ọdún 1990: Àwọn ipa àtìlẹ́yìn

[àtúnṣe | àtúnṣe àmìọ̀rọ̀]

Spacek ní ipa àtìlẹ́yìn gẹ́gẹ́ bí i ìyàwó Jim Garrison (tí Kevin Costner ṣe) nínú eré adánidúró òṣèlú Oliver Stone JFK (1991) ó sì ṣe ọ̀pọ̀lọpọ̀ eré apanilẹ́rìn-ín àti eré tẹlifíṣọ̀n. Ó ṣe Verena Talbo nínú eré oní-ròjinlẹ̀ apanilẹ́rìn-ín Charles Matthau The Grass Harp (1995), èyí tí ó tún un pa òun àti Lemmon pẹ̀lú Piper Laurie pọ̀. Spacek kó ipa àtìlẹ́yìn gẹ́gẹ́ bí i Margie Fogg, òṣìṣẹ́ ile-oúnjẹ, nínú eré oní-ìwà-ọ̀daràn neo-noir ti Paul Schrader Affliction (1997). Ó tún ṣe Rose Straight nínú eré ìtàn-ìgbésí-ayé David Lynch The Straight Story (1999) àti ìyá fún ẹ̀dá Brendan Fraser nínú eré ìrìn-àjò àràmàdà apanilẹ́rìn-ín onífẹ̀ẹ́ ti Hugh Wilson Blast from the Past (1999).

Àwọn ọdún 2000: Tẹlifíṣọ̀n àti ìmúgbòòrò iṣẹ́

[àtúnṣe | àtúnṣe àmìọ̀rọ̀]
Spacek níbi Toronto International Film Festival ti ọdún 2005

Spacek bẹ̀rẹ̀ àwọn ọdún 2000 pẹ̀lú ìyìn fún iṣẹ́ rẹ̀ gẹ́gẹ́ bí i Ruth Fowler, ìyá tí ọ̀fọ̀ ṣe tí ó ń wá ẹ̀san, nínú eré oní-ròjinlẹ̀ Todd Field In the Bedroom, èyí tí wọ́n gbé jáde ní ọdún 2001.[10] Stephen Holden ti The New York Times sọ nípa iṣẹ́ rẹ̀ nínú eré náà pé: "Iṣẹ́ Arábìnrin Spacek dùn mọ́ni ó sì wọni lára bí ó tilẹ̀ jẹ́ pé kò pariwo. Pẹ̀lú bíbó iṣan ọrùn rẹ̀ díẹ̀ àti yíyí ẹnu rẹ̀ sílẹ̀, ó fi àìní-àárẹ̀ ẹ̀dá rẹ̀ hàn, lẹ́yìn náà ó ṣe é déédé pẹ̀lú ìwà pẹ̀lẹ́ láti jẹ́ kí Ruth jọ ènìyàn gidi. Ó jẹ́ ọ̀kan lára àwọn iṣẹ́ tí ó tayọ jùlọ ti Arábìnrin Spacek."[30] Ó gba yíyàn kẹfà fún Àmì-ẹ̀yẹ Academy fún Òṣèré Obìnrin Tí Ó Dára Jùlọ, èyí tí ó fi ìdí rẹ̀ múlẹ̀ gẹ́gẹ́ bí i òṣèré obìnrin kẹjọ àti ti àìpẹ́ yìí tí ó gba ìyàn tí kò dín ní mẹ́fà fún ipa olú-ẹ̀dá Oscar. Láfikún, ó gba Àmì-ẹ̀yẹ New York Film Critics Circle àti Àmì-ẹ̀yẹ Los Angeles Film Critics Association fún Òṣèré Obìnrin Tí Ó Dára Jùlọ,[31] bákan náà pẹ̀lú Àmì-ẹ̀yẹ Critics' Choice fún Òṣèré Obìnrin Tí Ó Dára Jùlọ, Àmì-ẹ̀yẹ Golden Globe àti Independent Spirit Award for Best Female Lead, láàárín àwọn mìíràn.[32][33] Spacek kópa nínú eré oní-ròjinlẹ̀ àràmàdà onífẹ̀ẹ́ Jay Russell Tuck Everlasting (2002). Ní ọdún kan náà, wọ́n yàn án fún Àmì-ẹ̀yẹ Primetime Emmy fún Òṣèré Obìnrin Èkejì Tí Ó Dára Jùlọ fún iṣẹ́ rẹ̀ bí i Zelda Fitzgerald nínú eré sinimá Showtime Last Call (2002).

Spacek ṣe Ruth, ìyàwó tí ń ṣe àgbèrè, nínú eré oní-ròjinlẹ̀ Rodrigo García Nine Lives (2005) àti obìnrin tí ó ní àrùn ìgbàgbé nínú eré tẹlifíṣọ̀n Pictures of Hollis Woods (2007). Ó kó ipa àtìlẹ́yìn nínú eré apanilẹ́rìn-ín Seth Gordon Four Christmases (2008) àti ipa olú-ẹ̀dá nínú eré oní-ròjinlẹ̀ Lake City (2008). Spacek hàn nínú eré oní-ọ̀wọ̀ HBO Big Love fún ìṣẹ̀lẹ̀ mélòó kan gẹ́gẹ́ bí i lobist alágbára ti Washington, D.C. ó sì gba ìyàn fún Àmì-ẹ̀yẹ Primetime Emmy fún Òṣèré Obìnrin Àlejò Tí Ó Dára Jùlọ.[34] Ó gbohùn sí ìwé-kíkà oní-ohùn ti ọdún 2005 fún ìwé ìtàn àròsọ 1974 ti Stephen King Carrie.[35] Ní ọdún 2006, Spacek ka ìwé ìtàn àròsọ Harper Lee To Kill a Mockingbird (1960), èyí tí ó ta ẹ̀dà tí ó ju mílíọ̀nù ọgbọ̀n lọ.

Àwọn ọdún 2010: Ìwé ìtàn-ìgbésí-ayé àti ìpadàsí eré sinimá

[àtúnṣe | àtúnṣe àmìọ̀rọ̀]

Wọ́n bu ọlá fún Spacek pẹ̀lú ìràwọ̀ kan lórí Hollywood Walk of Fame ní ọdún 2011.[36] Ní ọdún kan náà, Spacek hàn nínú eré oní-ròjinlẹ̀ ìgbàanì ti Tate Taylor The Help, èyí tí àwọn akópa rẹ̀, pẹ̀lú Emma Stone, Viola Davis, Bryce Dallas Howard, Octavia Spencer, Jessica Chastain àti Allison Janney, gba Àmì-ẹ̀yẹ Screen Actors Guild.[37]

Ní ọdún 2012, Spacek tẹ ìwé ìtàn-ìgbésí-ayé rẹ̀ jáde, My Extraordinary Ordinary Life, pẹ̀lú alájọkọ̀wé Maryanne Vollers.[38][39] Jen Chaney ti The Washington Post pè é ní "èyí tí ó wà ní ìrẹ̀lẹ̀ lọ́nà tí ó tuni lára" àti "èyí tí wọ́n kọ lọ́nà tí ó lẹ́wà",[40] ó fi kún un pé àpèjúwe Spacek nípa ìgbà èwe rẹ̀ "dáran lóòótọ́ débi pé ènìyàn fẹ́rẹ̀ máa tọ́ ewé goatweed tí ó korò tí ó máa ń jẹ ní ọ̀sán nígbà ẹ̀ẹ̀rùn." Jay Stafford ti Richmond Times-Dispatch kọ̀wé pé, láì dàbí àwọn ìtàn-ìgbésí-ayé àwọn òṣèré mìíràn, ti Spacek "ní àǹfààní láti inú ìkọ̀wé gidi àti òtítọ́ inú."[41] Margaret Moser ti The Austin Chronicle kọ̀wé pé ìwé ìtàn-ìgbésí-ayé Spacek "rọrùn láti kà ó sì dùn láti gba sínú."[42] Kirkus Reviews ti Biographile kò fi bẹ́ẹ̀ nífẹ̀ẹ́ sí i, ó pè é ní "ìwé ìtàn-ìgbésí-ayé tí kò fi bẹ́ẹ̀ tayọ" àti "èyí tí àlàyé rẹ̀ pọ̀jù" nígbà tí ó ń ṣe ìríwí àìsí "ìtàn tí ó gun", ṣùgbọ́n ó yin Spacek fún híhu ìwà "ìrẹ̀lẹ̀ gidi."[43] Kirkus fi kún un pé "ìwé náà jẹ́ 'gbáà' kò sì ní eré-oníṣe tí ó tó láti fa àwọn òǹkàwé tí kò nífẹ̀ẹ́ sí Spacek àti iṣẹ́ rẹ̀ tààrà mọ́ra" àti pé ó wà "fún àwọn tí wọ́n nífẹ̀ẹ́ eré sinimá àti àwọn olólùfẹ́ Spacek nìkan."[43]

Spacek níbi ìṣàfihàn Get Low ní ọdún 2009

Spacek di òṣèré àkọ́kọ́ láti hàn nínú eré sinimá tí wọ́n yàn fún Àmì-ẹ̀yẹ Academy fún Eré Sinimá Tí Ó Dára Jùlọ ní ọ̀kọ̀ọ̀kan àwọn ẹ̀wádún mẹ́rin tí ó kọjá. Wọ́n gbé eré kọ̀ọ̀kan jáde ní ìbẹ̀rẹ̀ ẹ̀wádún rẹ̀: Coal Miner's Daughter (1980), Missing (1982), JFK (1991), In the Bedroom (2001) àti The Help (2011). Spacek hàn nínú eré oní-ìwà-ọ̀daràn Deadfall (2012). Ó tún kópa pẹ̀lú Robert Redford nínú ipa rẹ̀ tó kẹ́yìn kí ó tó fẹ̀yìntì nínú eré ìtàn-ìgbésí-ayé oní-ìwà-ọ̀daràn David Lowery The Old Man & the Gun (2018), èyí tí ó gba àwọn àgbéyẹ̀wò rere lọ́wọ́ àwọn olùríwí.[44] Spacek tún ní àwọn ipa olú-ẹ̀dá nínú oríṣiríṣi eré oní-ọ̀wọ̀ tẹlifíṣọ̀n ní ìparí àwọn ọdún 2010. Ó ṣe ìyá agbo ilé Sally Rayburn nínú eré oní-ọ̀wọ̀ Netflix Bloodline, èyí tí wọ́n ṣàfihàn rẹ̀ láti ọdún 2015 sí 2017; Ruth Deaver nínú eré oní-ọ̀wọ̀ Hulu Castle Rock (2018), èyí tí ó hun àwọn ẹ̀dá àti àkòrí láti ìlú ìtàn àròsọ King ti Castle Rock, Maine pọ̀; àti Ellen Bergman, ìyá fún ẹ̀dá Julia Roberts, nínú eré oní-ọ̀wọ̀ Amazon Prime Video Homecoming (2018).

Iṣẹ́ ní àwọn ọdún 2020

[àtúnṣe | àtúnṣe àmìọ̀rọ̀]

Spacek kópa pẹ̀lú Dustin Hoffman nínú iṣẹ́ olùdarí àkọ́kọ́ ti Darren Le Gallo Sam & Kate (2022).[45] Ní ọdún kan náà, ó ṣeré nínú eré oní-ọ̀wọ̀ Amazon Prime Video Night Sky, pẹ̀lú J. K. Simmons. Pẹ̀lú àwọn àgbéyẹ̀wò rere, wọ́n fòpin sí eré náà lẹ́yìn sáà àkọ́kọ́.

Ayé ara ẹni

[àtúnṣe | àtúnṣe àmìọ̀rọ̀]

Spacek fẹ́ olùṣe-apẹrẹ ìgbékalẹ̀ àti olùdarí iṣẹ́-ọnà Jack Fisk ní ọdún 1974, lẹ́yìn tí wọ́n pàdé níbi ìyawòrán Badlands.[10] Wọ́n ní ọmọbìnrin méjì: Schuyler Fisk, ẹni tí a bí ní ọjọ́ kẹjọ Oṣù keje, ọdún 1982, àti Madison Fisk, ẹni tí a bí ní ọjọ́ kọkànlélógún Oṣù kẹsàn-án, ọdún 1988.[46] Schuyler ti tẹ̀lé ipa-ọ̀nà ìyá rẹ̀ gẹ́gẹ́ bí i òṣèré àti olórin. Spacek àti ẹbí rẹ̀ kó lọ sí oko kan ní tòsí Charlottesville, Virginia, ní ọdún 1982.[47]

Àtòjọ àwọn eré

[àtúnṣe | àtúnṣe àmìọ̀rọ̀]

Eré sinimá

[àtúnṣe | àtúnṣe àmìọ̀rọ̀]
Ọdún Àkọlé Ipa Àlàyé
1972 Prime Cut Poppy Eré àkọ́kọ́
1973 Geo Funny Book Stories Coraline Jones Ohùn
Badlands Holly Sargis
1974 Ginger in the Morning Ginger [48]
Phantom of the Paradise N/A Olùtọ́jú ètò-ìpele
1976 Vigilante Force N/A Olùrànlọ́wọ́ olùdarí iṣẹ́-ọnà àti olùtọ́jú ètò-ìpele; Kò sí nínú àkọsílẹ̀
Carrie Carrie White
Welcome to L.A. Linda Murray
1977 3 Women Pinky Rose
Death Game N/A Olùtọ́jú ètò-ìpele
1980 Coal Miner's Daughter Loretta Lynn
Heart Beat Carolyn Cassady
1981 Raggedy Man Nita Longley
1982 Missing Beth Horman
1983 The Man with Two Brains Anne Uumellmahaye (ohùn) Kò sí nínú àkọsílẹ̀[29]
1984 The River Mae Garvey
1985 Marie Marie Ragghianti
1986 Violets Are Blue Augusta "Gussie" Sawyer
'night, Mother Jessie Cates
Crimes of the Heart Babe Magrath Botrelle
1990 The Long Walk Home Miriam Thompson
1991 Hard Promises Christine Ann Coalter
JFK Liz Garrison
Rabbit Ear: The Talking Eggs Olùsọ̀tàn (ohùn) Eré sinimá kúkúrú
1994 Trading Mom Mrs. Martin àti àwọn ipa mìíràn
1995 The Grass Harp Verena Talbo
1997 Affliction Margie Fogg
1999 Blast from the Past Helen Thomas Webber
The Straight Story Rose "Rosie" Straight
2001 In the Bedroom Ruth Fowler
Midwives Sibyl Danforth
2002 Tuck Everlasting Mae Tuck
2003 A Decade Under the Influence Ara rẹ̀ Eré ìtàn òtítọ́
2004 A Home at the End of the World Alice Glover
2005 Nine Lives Ruth
The Ring Two Evelyn Borden (née Osorio)
North Country Alice Aimes
An American Haunting Lucy Bell
2006 Summer Running: The Race to Cure Breast Cancer Mrs. Flora Good Eré ìtàn òtítọ́
2007 Gray Matters Sydney
Hot Rod Marie Powell
Pictures of Hollis Woods Josie Cahill
2008 Lake City Maggie
Four Christmases Paula
2009 Get Low Mattie Darrow
2011 The Help Mrs. Walters
2012 Deadfall June Mills
2016 River of Gold[49] Olùsọ̀tàn (ohùn) Eré ìtàn òtítọ́
2018 The Old Man & the Gun Jewel
2022 Sam & Kate Tina
2025 Die, My Love Pam

Tẹlifíṣọ̀n

[àtúnṣe | àtúnṣe àmìọ̀rọ̀]
Ọdún Àkọlé Ipa Àlàyé
1973 Love, American Style Teri Ìṣẹ̀lẹ̀: "Love and the Older Lover"
The Girls of Huntington House Sara Eré sinimá orí tẹlifíṣọ̀n
The Waltons Sarah Jane Simmonds Àwọn ìṣẹ̀lẹ̀: "The Townie", "The Odyssey"
The Rookies Barbara Tabnor Ìṣẹ̀lẹ̀: "Sound of Silence"
1974 The Migrants Wanda Trimpin Eré sinimá orí tẹlifíṣọ̀n
1975 Katherine Katherine Alman
1978 Verna: USO Girl Verna Vane
1992 A Private Matter Sherri Finkbine
Shelley Duvall's Bedtime Stories Olùsọ̀tàn Sáà 1 Ìṣẹ̀lẹ̀ 4
1994 A Place for Annie Susan Lansing Eré sinimá orí tẹlifíṣọ̀n
1995 The Good Old Boys Spring Renfro
Streets of Laredo Lorena Parker Ìṣẹ̀lẹ̀ 3
1996 Beyond the Call Pam O'Brien Eré sinimá orí tẹlifíṣọ̀n
If These Walls Could Talk Barbara Barrows Eré sinimá orí tẹlifíṣọ̀n; apá: "1974"
2000 Songs in Ordinary Time Marie Fermoyle Eré sinimá orí tẹlifíṣọ̀n
2002 Last Call Zelda Fitzgerald
2009 Appalachia: A History of Mountains and People Olùsọ̀tàn (ohùn) Ìṣẹ̀lẹ̀ 4
2010 Gimme Shelter Adrienne Nourse Eré ìdánwò
2010–2011 Big Love Marilyn Densham Ìṣẹ̀lẹ̀ 5
2015–2017 Bloodline Sally Rayburn Ìṣẹ̀lẹ̀ 33
2018 Castle Rock Ruth Deaver Ìṣẹ̀lẹ̀ 8
Homecoming Ellen Bergman Ìṣẹ̀lẹ̀ 6
2022 Night Sky Irene York Ìṣẹ̀lẹ̀ 8
2025 Dying for Sex Gail Eré oní-ọ̀wọ̀ kékeré

Fídíò orin

[àtúnṣe | àtúnṣe àmìọ̀rọ̀]
Ọdún Àkọlé Olórin Àlàyé
2018 "Oh Baby" LCD Soundsystem

Àtòjọ àwọn orin

[àtúnṣe | àtúnṣe àmìọ̀rọ̀]

Àwọn àwo orin

[àtúnṣe | àtúnṣe àmìọ̀rọ̀]
Ọdún Àwo orin US Country Ilé-iṣẹ́
1983 Hangin' Up My Heart 17 Atlantic

Àwọn orin àdákọ

[àtúnṣe | àtúnṣe àmìọ̀rọ̀]
Ọdún Orin àdákọ Ipo lórí àtẹ Àwo orin
US Country US Bubbling CAN Country
1980 "Coal Miner's Daughter" 24 — 7 Coal Miner's Daughter (Soundtrack)
"Back in Baby's Arms" — — 71
1983 "Lonely but Only for You" 15 10 13 Hangin' Up My Heart
1984 "If I Can Just Get Through the Night" 57 — 41
"If You Could Only See Me Now" 79 — —

Àwọn àmì-ẹ̀yẹ àti ìyàn

[àtúnṣe | àtúnṣe àmìọ̀rọ̀]

Ẹ tún le wo

[àtúnṣe | àtúnṣe àmìọ̀rọ̀]

Àwọn ìwé àkàsíwájú

[àtúnṣe | àtúnṣe àmìọ̀rọ̀]

Àwọn ìjápọ̀ ìta

[àtúnṣe | àtúnṣe àmìọ̀rọ̀]
Àyọkà yìí tàbí apá rẹ̀ únfẹ́ àtúnṣe sí.

Ẹ le fẹ̀ jù báyìí lọ tàbí kí ẹ ṣàtúnṣe rẹ̀ lọ́nà tí yíò mu kúnrẹ́rẹ́. Ẹ ran Wikipedia lọ́wọ́ láti fẹ̀ẹ́ jù báyìí lọ.

Itokasi

[àtúnṣe | àtúnṣe àmìọ̀rọ̀]
  1. ↑ "Sissy Spacek | Biography, Movies, & Facts". Encyclopedia Britannica (in Èdè Gẹ̀ẹ́sì). Retrieved 2021-03-08.
  2. ↑ Prudom, Laura (September 14, 2016). "'Bloodline' Ending After Season 3 on Netflix". Retrieved September 14, 2016.
  3. ↑ "Sissy Spacek". Britannica.com. Retrieved 14 November 2025.
  4. ↑ Virginia Spacek death register Ancestry.com
  5. ↑ "Edwin A Spacek – US Social Security Death Index". Retrieved June 6, 2016.
  6. ↑ "Sissy Spacek The Coal Miner's Daughter". New Straits Times. October 9, 1981. https://news.google.ca/newspapers?id=f7QTAAAAIBAJ&sjid=4I8DAAAAIBAJ&pg=6364,1798627&dq=sissy-spacek-the-coal-miner's-daughter&hl=en.
  7. ↑ Ancestry of Sissy Spacek. Wargs.com.
  8. ↑ Hattenstone, Simon (May 9, 2022). "'I'd carry the misery around with me all day': Sissy Spacek on acting, grief and her sci-fi debut at 72". The Guardian. https://www.theguardian.com/film/2022/may/09/sissy-spacek-acting-grief-sci-fi-debut-72-badlands-coal-miners-daughter-carrie.
  9. ↑ Texas Monthly, vol. 19, no. 2, Feb. 1991, p. 124
  10. 1 2 3 4 5 6 7 8 9 10 11 12 Stated on Inside the Actors Studio, 2002
  11. 1 2 3 "Sissy Spacek". Bio. Retrieved June 6, 2016.
  12. ↑ https://www.interviewmagazine.com/film/sissy-spacek-by-andy-warhol
  13. ↑ Ouzounian, Richard (April 27, 2012). "Big Interview: Sissy Spacek". Toronto Star. https://www.thestar.com/entertainment/2012/04/27/big_interview_sissy_spacek.html.
  14. ↑ Godfrey, Alex (March 19, 2015). "Sissy Spacek: "I was fearless"". The Guardian. https://www.theguardian.com/tv-and-radio/2015/mar/19/sissy-spacek-bloodline-interview-fearless.
  15. ↑ "Sissy Spacek's shy career". February 7, 2002. https://news.bbc.co.uk/2/hi/in_depth/entertainment/2002/oscars_2002/1802501.stm.
  16. ↑ Canby, Vincent (October 15, 1973). "Badlands". NYT Critics' Pick. The New York Times. Retrieved July 12, 2011.
  17. ↑ Brian De Palma.net, archived from the original on September 21, 2007 Unknown parameter |url-status= ignored (help)
  18. ↑ Kael, Pauline (November 15, 1976). "Brian De Palma's "Carrie," Reviewed". The New Yorker. https://www.newyorker.com/magazine/1976/11/22/the-curse.
  19. ↑ Canby, Vincent (April 11, 1977). "Altman's '3 Women' a Moving Film; Shelley Duvall in Memorable Role". The New York Times.
  20. ↑ "Show Business: Basic Spacek: Keeping Life Tidy". Time. December 6, 1976. Archived from the original on January 20, 2013. https://web.archive.org/web/20130120181330/http://www.time.com/time/magazine/article/0,9171,911902-1,00.html. Retrieved May 23, 2010.
  21. ↑ Ebert, Roger (January 1, 1980). "Coal Miner's Daughter". Chicago Sun-Times. http://rogerebert.suntimes.com/apps/pbcs.dll/article?AID=/19800101/REVIEWS/1010310/1023.
  22. ↑ Andrew Sarris, Village Voice. Coal Miner's Daughter review. March 10, 1980
  23. ↑ Joel Whitburn's Music Yearbook (1983) ISBN 978-0-898-20163-5 p. 154
  24. ↑ Cassady, Carolyn (July 1976). Heartbeat: My Life with Jack and Neal. Creative Arts Book Company. ISBN 978-0916870034.
  25. ↑ Brenner, Paul. "Heart Beat > Overview". AllMovie. Retrieved August 30, 2010.
  26. ↑ "From a nymphette to weirdo". The Montreal Gazette. November 19, 1979. https://news.google.com/newspapers?id=w2UxAAAAIBAJ&pg=3134%2C3920202.
  27. ↑ "Heart Beat (1980) at Rotten Tomatoes". Rotten Tomatoes. Retrieved December 21, 2015.
  28. ↑ Ebert, Roger. "Heart Beat movie review & film summary (1980)". Rogerebert.com.
  29. 1 2 "Movies You Might Have Missed: Carl Reiner's The Man with Two Brains". The Independent. June 21, 2017. https://www.independent.co.uk/arts-entertainment/films/features/movies-you-might-have-missed-carl-reiner-the-man-with-two-brains-steve-martin-a7801011.html.
  30. ↑ Holden, Stephen (November 23, 2001). "When Grief Becomes A Member of the Family". The New York Times. https://movies.nytimes.com/movie/review?res=9401EED8143AF930A15752C1A9679C8B63.
  31. ↑ King, Susan (December 16, 2001). "'Bedroom' Is Top Pick of L.A. Film Critics". Los Angeles Times. https://www.latimes.com/archives/la-xpm-2001-dec-16-me-15388-story.html.
  32. ↑ Broadcast Film Critics Association. "7th Critics' Choice Movie Awards Winners and Nominees". Broadcast Film Critics Association. Archived from the original on February 4, 2012. Retrieved March 28, 2013. Unknown parameter |url-status= ignored (help)
  33. ↑ LaSalle, Mick (January 21, 2002). "Golden Globes 2002 / A night for the Aussies / 'Beautiful Mind,' 'Moulin Rouge,' cable TV take top Golden Globes". San Francisco Chronicle. http://www.sfgate.com/entertainment/article/GOLDEN-GLOBES-2002-A-night-for-the-Aussies-2881537.php#page-2.
  34. ↑ Gina DiNunnot (September 17, 2009). "Sissy Spacek Signs On for Big Love". TVGuide.com. https://www.tvguide.com/News/Sissy-Spacek-Signs-1009847.aspx.
  35. ↑ "StephenKing.com – Carrie". Retrieved October 26, 2013.
  36. ↑ "Actress Sissy Spacek To Receive Star On Hollywood Walk Of Fame Next Monday". Beverly Hills Courier. July 26, 2011. Archived from the original on July 22, 2012. https://archive.today/20120722214810/http://www.bhcourier.com/article/Local/Local/Actress_Sissy_Spacek_To_Receive_Star_On_Hollywood_Walk_Of_Fame_Next_Monday/78562.
  37. ↑ "The 18th Annual Screen Actors Guild Awards | Screen Actors Guild Awards". Sagawards.org (in Èdè Gẹ̀ẹ́sì). Retrieved February 4, 2017.
  38. ↑ Sissy Spacek; Maryanne Vollers (May 2012). My Extraordinary Ordinary Life. Hyperion. http://www.hyperionbooks.com/book/my-extraordinary-ordinary-life/. Retrieved May 6, 2012.
  39. ↑ Douglass K. Daniel (April 30, 2012). "Quitman Native Sissy Spacek Writes Tender, Touching Book". Tyler Morning Telegraph. Associated Press. Archived from the original on May 8, 2012. https://web.archive.org/web/20120508064250/http://www.tylerpaper.com/article/20120430/NEWS01/120439980.
  40. ↑ Chaney, Jen. "Book review: Sissy Spacek's "My Extraordinary Ordinary Life"". Denver Post. http://www.denverpost.com/books/ci_20859036/book-review-my-extraordinary-ordinary-life-by-sissy.
  41. ↑ Stafford, Jay (May 6, 2012). "Nonfiction review: My Extraordinary Ordinary Life". timedispatch.com. Retrieved March 15, 2013.
  42. ↑ Moser, Margaret. "My Extraordinary Ordinary Life". The Austin Chronicle. http://www.austinchronicle.com/screens/2012-05-04/new-in-print/.
  43. 1 2 Kirkus Reviews. "My Extraordinary Ordinary Life". kirkusreviews.com. Retrieved March 15, 2013.
  44. ↑ "The Old Man & the Gun (2018)". Rotten Tomatoes. Fandango. Retrieved April 12, 2025.
  45. ↑ Kroll, Justin (10 June 2021). "Dustin Hoffman And Sissy Spacek To Star in Darren Le Gallo's 'Sam & Kate' – Cannes Market". Deadline Hollywood. Retrieved 4 May 2022.
  46. ↑ Finlayson, Ariana. "Sissy Spacek's Daughter, Schuyler Fisk, Is Married!". US Weekly. http://www.usmagazine.com/celebrity-news/news/sissy-spaceks-daughter-schuyler-fisk-is-married-2012275. Retrieved March 23, 2013.
  47. ↑ "Sissy Spacek's Wonderful Life". Richmond Times Despatch. January 18, 2013. http://www.richmond.com/entertainment/article_47d68bfb-023d-51ac-9b92-70afc97f66c2.html.
  48. ↑ "Ginger in the Morning". AFI Catalog of Feature Films (in Èdè Gẹ̀ẹ́sì). American Film Institute. Retrieved February 13, 2018.
  49. ↑ "River of Gold". riverofgoldfilm.com.
Jẹ́ kíkójáde láti "https://yo.wikipedia.org/w/index.php?title=Sissy_Spacek&oldid=610915"