Délé Òjó

Dele Ojo
Orúkọ àbísọ	James Ogundele Ojo
Wọ́n tún mọ̀ọ́ bíi	Terena
Ọjọ́ìbí	10 Oṣù Keje 1938; Ìlárá-Mọ̀kín, Ìpínlẹ̀ Òǹdó, Nàìjíríà
Aláìsí	3 May 2018 (ọmọ ọdún 79)
Irú orin	Afrobeat, Jazz, Háiláàfù
Occupation(s)	Oǹkọwe-orin, olórin, òjíṣẹ́ Ọlọ́run, olùkọ́
Instruments	Fèrè (Trumpet), Gìtá baasi (Bass guitar)
Years active	1959-2016
Associated acts	Victor Olaiya, Dele Ojo & His Star Brothers

Dele Ojo (10 Oṣù Keje 1938 – 3 Oṣù Karùn-ún 2018) jẹ́ olórin àti òṣèré ọmọ orílẹ̀-èdè Nàìjíríà. Wọ́n bọ̀wọ̀ fún un gẹ́gẹ́ bí ọ̀kan lára àwọn olórin tí ó gbé orin Jùjú tàn ká, tí ó sì sọ ọ́ di gbajúmọ̀.^[1]

Ìbẹ̀rẹ̀ Ayé Rẹ̀

James Ogundele Ojo ni wọ́n bí ní ọjọ́ kẹwàá Oṣù Keje ọdún 1938 ní abúlé Ìlárá-Mọ̀kín. Òun nìkan ni ọmọ tí Òjó-ọya àti ìyàwó rẹ̀ bí. Ó wá láti ìdílé tí wọ́n ń sìnkà ẹ̀sìn abínibí Yorùbá dáadáa. Bàbá rẹ̀ ń bọ Ògún, ìdí nìyí tí wọ́n fi sọ ọ́ ní Ogúndélé, èyí tó túmọ̀ sí "Ògún dé ilé." Àwọn òbí rẹ̀ padà yípadà sí ẹ̀sìn Kìrìsìtẹ́ẹ́nì, wọ́n sì sọ ọ́ ní James. Bàbá rẹ̀ Ojooya ni àbíkẹ́yìn nínú àwọn ọmọ mẹ́fà tí Ọ̀ṣúnrẹ̀mádé "Osunre", àti ọkọ rẹ̀ Obasanya bí. Osunre máa ń bọ Olókun àti Ọ̀ṣun, ó sì jẹ́ ìjòyè "Eye Oduno" ní Ìlárá-Mọ̀kín. Obasanya tó jẹ́ bàbá Ojo-oya kú nígbà tí ó ṣì kéré, ìyá rẹ̀ sì tún fẹ́ ọkùnrin mìíràn tí ń jẹ́ Atiko, ẹni tí ó tún bá Osunre bí ọmọbìnrin méjì.

Ìdílé Ifá àti abọ̀gún ni wọ́n ti bí Osunre. Òun ni ọmọ kẹta tí Aóòláè (babalawo kan tó jẹ́ Ọbaálá ti Ìlárá-Mọ̀kín) àti ìyàwó rẹ̀ kejì, Ifalọ̀úrọ̀ (abọrẹ̀ Olókun tó jẹ oyè Elerege) bí. Elerege yìí ni olórí ọdún kan tí wọ́n máa ń ṣe lọ́dọọdún láti fi bọlá fún ipò obìnrin, wúńdíá, àti láti bọ òrìṣà Òlúa. Osunre jẹ́ àbúrò obìnrin fún Igodan ajabi elewa, jagunjagun Kiriji War kan tó bá Ogedengbe ti Ilesa jagun. Ifalouro, ìyá ńlá Dele Ojo, wá láti ìlú Ìgbàrà-òkè. Òun pẹ̀lú jẹ oyè "Eye Oduno," wọ́n sì bí i sínú ìdílé Ọbaálá ti Ìgbàrà-Òkè, ó tún ní ìbátan ní ìlú Akure.

Ẹ̀kọ́ Rẹ̀

Ó lọ sí ilé-ìwé alákọ̀ọ́bẹ̀rẹ̀ St. Michael's láti ọdún 1944 sí 1955.^[2] Gẹ́gẹ́ bí akẹ́kọ̀ọ́ tuntun ní ilé-ìwé alákọ̀ọ́bẹ̀rẹ̀ ní ọdún 1952, bàbá rẹ̀ sanwó fún un láti kọ́ bí wọ́n ṣe ń tẹ ẹ̀rọ ìkọ̀wé (typewriter). Ní ọdún 1954, ó rí iṣẹ́ gẹ́gẹ́ bí akọ̀wé ṣùgbọ́n ó kọ̀wé fi iṣẹ́lẹ̀ lẹ́yìn oṣù mẹ́ta kí wọ́n tó fún un ní iṣẹ́ mìíràn gẹ́gẹ́ bí olùkọ́ ilé-ìwé ládùúgbò rẹ̀.^[3]

Iṣẹ́ Rẹ̀

Iṣẹ́ orin Ojo bẹ̀rẹ̀ nígbà tí ó pàdé Victor Olaiya, ẹni tí ó gbà á síṣẹ́ gẹ́gẹ́ bí aṣofèrè nínú ẹgbẹ́ akọrin rẹ̀. Ní ọdún 1961, Ojo dá ẹgbẹ́ akọrin tirẹ̀ sílẹ̀ tí ó pè ní "Dele Ojo & His Star Brothers" lẹ́yìn tí Olaiya tú ẹgbẹ́ rẹ̀ ká. Ojo àti ẹgbẹ́ rẹ̀ bẹ̀rẹ̀ sí í gbé orin jáde tí wọ́n sì ń kọrin ní àwọn ibi ayẹyẹ ńlá ní Ìpínlẹ̀ Èkìtì, Èkó àti Ìpínlẹ̀ Ọ̀ṣun, tí àwọn ènìyàn sì fẹ́ràn wọn púpọ̀. Wọ́n tún rìnrìn-àjò lọ kọrin ní ọ̀pọ̀lọpọ̀ ìlú ní orílẹ̀-èdè Amẹ́ríkà.^[3]

Ó kú ní ọjọ́ kẹta Oṣù Karùn-ún ọdún 2018 ní ìlú rẹ̀ Ìlárá-Mọ̀kín ní Ìpínlẹ̀ Òǹdó nígbà tí ó pé ẹni ọdún mọ́kàndínlọ́gọ́rin (79).^[4]

Àkójọ Àwọn Orin Rẹ̀

Alafia
Juju Music at Its Best

Àwọn Ìtọ́kasì

↑ Bode Omojola (2006). Popular Music in Western Nigeria: Theme, Style, and Patronage System. IFRA. ISBN 978-978-8025-11-5. https://books.google.com/books?id=_K0mAQAAIAAJ.
↑ "Veteran Highlife Singer, Dele Ojo Is Dead". Reporters At Large. 4 May 2018.
1 2 Ben-Nwankwo, Nonye (21 May 2016). "I left the US when my band members deserted me – Dele Ojo". The Punch. http://www.punchng.com/i-left-the-us-when-my-band-members-deserted-me-dele-ojo/. Retrieved 27 May 2016.
↑ "Highlife Legend Dele Ojo Dies at 79". National Insight. 4 May 2018.

[Omojola2006-1] Bode Omojola (2006). Popular Music in Western Nigeria: Theme, Style, and Patronage System. IFRA. ISBN 978-978-8025-11-5. https://books.google.com/books?id=_K0mAQAAIAAJ.

[2] "Veteran Highlife Singer, Dele Ojo Is Dead". Reporters At Large. 4 May 2018.

[punch-3] 1 2 Ben-Nwankwo, Nonye (21 May 2016). "I left the US when my band members deserted me – Dele Ojo". The Punch. http://www.punchng.com/i-left-the-us-when-my-band-members-deserted-me-dele-ojo/. Retrieved 27 May 2016.

[4] "Highlife Legend Dele Ojo Dies at 79". National Insight. 4 May 2018.

[1]

[2]

[3]

[4]